Archiv:Wi freit uns dat wi leven doot & lachen künnt!

WI FREIT UNS DAT WI LEVEN DOOT & LACHEN KÜNNT!

Uns gifft dat all siet 37 Jahr. De Rektor von uns Aukrog School, Reinhold Ohm harr de Idee. He wull, in Verbinnung mit de Volkshochschool, een plattdüütsche Theatergruppe grünnen. 1979 weer dat sowiet, 15 bit dorhin unbekannte Huusfron, Landwirte, Beamte usw. wulln sik as Schauspeelers,Tosegger oder Bühnenarbeider versöken; mit Reinhold Ohm as Speelboos. Övt hebbt wi in een Klassenruum von de School. In de Tiet von 1979-1992 hebbt wi 25 Eenakter speelt. 1993 hebbt wi uns dat eerste Mal an een Dreeakter versöcht. Dat Publikum weer begeistert, und wi? Wi weern stolt dat wi uns truut hebbt. Bit 2016 hebbt wi nu all 20 Mehrakter speelt. För Sketche, z.B. as een Geschenk för Geburtsdaagsfiern un Hochtieden sünd wi ok buchbar.

Uns Mitgleedertahl liggt jümmers so bi 15 - 20, de een oder annere is all siet över 30 Jahr dorbi. Reinhol Ohm weer bit 1988 uns Speelboos, dann is he leider storven. Sien Ehefro Ursel Ohm hett denn Speelkrink wiederföhrt – eer Motto:

Alle Daag een beten Freid bruukt de Mensch
to´n leven! Un wenn he düt beten Freid annern
kann geven, warrt dorut een lüür-lüüt Glück und
kümmt op een sülvst torüch.

Von 1988 - 2009 harr Ursel Ohm de Leitung von uns Speelkrink. Övt hebbt wi nu ganz komodi im Ohmschen Keller bi Saft un Knabbertüüch. 2009 hett Margrit Kock-Böttke, de ok all siet 1994 in uns Krink mitspeelt, de Leitung övernahmen. Uns Provenruum harrn wi nu in de ole Bürgermeisterstuuv in` t Gemeendehuus. Siet 2014 övt wi wedder in de School(Aula). Wi övt von Okt – Febr/März. In de Saison föhrt wi uns Dreeakter teinmal op. Wiel speelt in Aukrog/Tivol, in Timmaspe/Asper Krog, Nortorf/Ritzebüttel, Wasbek/ Kühls Gasthof fröher ok, In Gnutz/ Zur Erholung und Tönsheide. Bühnen sünd vorhannen aber keen Kulissen, dorüm bruukt wi een transportable Kulisse.

Anfungen hebbt wi mit Sackleinen. Op grote Stoffbahnen wurrn de Fenster, Dören un Möbelmang eenfach opmaalt un denn op Gestänge troggen. Uns tweete Kulisse weer een Horizontal-Ziehharmonika-Modell ut Lichtholt, von baben na ünnen faltbar. Nu sünd wi vertikal. Wi hebbt een ganz stabilet Modell ut Platten 1,20 x 2,50 eenfach optoboon un variabel. Siet eenige Jahrn hebbt wi sogar een eegen Lichtanlaag. Sik in een Rull rintodenken is jümmers wedder een Herutforderung – un sik to verkleeden maakt veel Spass. Un de Texte?? Dor gifft dat blots eens – öven, öven. öven!! Wer Lust dorto hett – wi freit uns jümmers över Towachs.